వేల ఏండ్లుగా ఇండియాలో సామాజిక అభివృద్ధికి, మానవ మనుగడకు ఎనలేని సేవ చేసిన వెనుకబడిన తరగతుల ప్రజలు నేడు బతుకు భారమై బతకలేక బలిదానాలు చేసుకుంటున్న దుస్థితిలో ఉన్నారు. ఆది మానవ సమాజం నుండి ఆధునిక సమాజం వరకు బి.సి లు ఉత్పత్తిలో కీలకపాత్ర వహించడమే కాకుండా ఎన్నో ఆవిష్కరణలు చేసి శాస్త్రజ్ఞులుగా నిలిచారు. దేశంలో జనాభాలో సగానికి ఎక్కువగా ఉన్న బి.సి లు నేటికి ఉత్పత్తిలో, శ్రమలో కీలకపాత్ర వహిస్తున్నారు. అలాంటి బి.సి లను ఆధిపత్య కులాల పాలకులు ఆధినుండి చిన్నచూపు చూస్తూ అన్ని రంగాల్లో శ్రమ దోపిడీ చేస్తూ అణచివేస్తున్నారు.
దేశంలో బ్రిటిష్ పాలన కొనసాగుతున్న సమయంలోనే వెనుకబడిన వర్గాలు, అంటరాని కులాలు, ముస్లింలకు జరుగుతున్న అన్యాయలపై పోరు చేసి జనాభా ప్రాతిపదికన ప్రత్యేక నియోజకవర్గాల ప్రాతినిధ్యం ఇవ్వాలని అన్ని రంగాల్లో అవకాశం కల్పించాలని ఉద్యమాలు చేశారు. ఫలితంగా ముస్లింలు, ఎస్సిలు, క్రిస్టియన్లకు ప్రత్యేక నియోజకవర్గాలు కేటాయించారు. బి.సి లకు మాత్రం ఎలాంటి ప్రత్యేక నియోజకవర్గాలు కేటాయించలేదు. స్వాతంత్ర ఉద్యమ సమయం, రాజ్యాంగ రచన సమయంలో బి.సి. ల హక్కుల గూర్చి, విద్యా ఉద్యోగ రంగాల్లో బి.సి ల రిజర్వేషన్ గూర్చి, రాజకీయ రిజర్వేషన్ల గూర్చి పోరాటం చేసినా అప్పటి కాంగ్రెస్ నాయకులు ఆ పోరాటాలను నీరుగార్చారు.
స్వాతంత్రం సిద్ధించిన అనంతరం బి.సి ల హక్కుల పోరాటం వల్ల బి.సి ల సామాజిక ఆర్ధిక స్థితిగతులను స్టడీ చేయడం కోసం 1953 జనవరిలో కాకా కలేల్కర్ కమిషన్ ను ప్రభుత్వం నియమించింది. 1955 మార్చిలో కమిషన్ నివేదిక సమర్పించి బి.సి ల అభివృద్ధికి పలు సూచనలు చేసింది. దేశంలో 2399 కులాలు వెనుకబడిన తరగతులుగా ఉన్నాయని అందులో 837 కులాలు బాగా వెనుకబడిన కులాలుగా ఉన్నాయని నివేదికలో తెలిపింది. భూ సంస్కరణలు జరిపించాలని, గ్రామీణ ఆర్ధిక వ్యవస్థ పునవ్యవస్థీకరించాలని, వయోజన విద్య, విశ్వవిద్యాలయాల చదువులు మొదలగు అనేక రంగాల్లో వెనుకబడిన తరగతుల కోసం సత్వరాభివృద్ధి చేపట్టాలని సూచనలు చేశారు. 1961 లో కులాల వారీగా జనాభా లెక్కలు తీయాలని, కమీషన్ సమర్పించిన నివేదికను ప్రభుత్వం బుట్టదాకలు చేసింది.
1977 లో జనతా పార్టీ తన ఎన్నికల మేనిఫెస్టోలో తాము అధికారంలోకి వస్తే కాకా కలేల్కర్ కమీషన్ నివేదిక అమలు చేసి బీ.సి లకు న్యాయం చేస్తామని తెలిపింది. అధికారంలోకి వచ్చిన జనతా పార్టీ కమీషన్ నివేదికను అమలుపరచక పోవడంతో బి.సి సంఘాల, నాయకులు ఒత్తిడి చేయడంతో అప్పటి ప్రధాని మొరార్జీ దేశాయి ప్రభుత్వం మరోలా స్పందించి కాక కలెల్కర్ కమీషన్ నివేదిక సమర్పించి చాలా ఏండ్లు అయిందని కొత్త కమిషన్ నియమిస్తామని చెప్పింది.
బీహార్ మాజీ ముఖ్యమంత్రి బి.పి మండల్ ఆధ్వర్యంలో 1978 డిసెంబర్ లో రెండవ బి.సి కమీషన్ నియమించింది. బి.పి. మండల్ 1980 డిసెంబర్ 31 న నివేదికను ప్రభుత్వానికి సమర్పించారు. మళ్ళీ పాత కథే నివేదిక అమలులో జాప్యం దాంతో బి.సి నాయకులంతా ఏకమై 1981 సెప్టెంబర్ లో నేషనల్ యూనియన్ ఆఫ్ బ్యాక్ వార్డ్ క్లాసెస్ అనే ఒక ఉద్యమ సంస్థగా ఏర్పటు చేశారు. బీహార్ మాజీ ముఖ్యమంత్రి కర్పూరి ఠాకూర్ ఒక సంస్థను ప్రారంభించగా చౌదరి బ్రహ్మప్రకాష్ అధ్యక్షులుగా ఉండి ఉద్యమం చేశారు. 110 మంది పార్లమెంటు సభ్యులు సంతకాలతో కూడిన మెమోరాండం ప్రభుత్వానికి సమర్పించారు. ఐదు లక్షల ప్రజల సంతకాలతో కూడిన మెమోరాండం రాష్టపతి జ్ఞాని జైల్ సింగ్ కు ఇచ్చారు. 1988 నుండి 1990 వరకు బహుజన సమాజ్ పార్టీ మండల్ నివేదిక అమలుకు పోరాటం చేసింది. ఢిల్లీ లోని బోట్స్ క్లబ్ వద్ద కాన్షీరాం 48 రోజుల ధర్నా చేసాడు. ఉద్యమాల ఒత్తిడి, మ్యానిఫెస్టోలో ఇచ్చిన మాట నిలబెట్టుకోవడం కోసం అప్పటి ప్రధాని వి.పి సింగ్ 1990 ఆగస్టు 7 న మండల్ నివేదిక అమలుపరుస్తానని ప్రకటన చేసాడు.
ప్రధాని ప్రకటనతో దేశ వ్యాప్తంగా ఆధిపత్య కులాల ఆందోళన చేయడమే కాకుండా అన్ని పార్టీలు మండల్ నివేదికకు వ్యతిరేకంగా పెద్ద ఎత్తున ఉద్యమం చేశాయి. నిరసనగా బయట నుండి వి.పి ప్రభుత్వానికి మద్దతు ఇస్తున్న బీజేపీ మద్దతు ఉపసంహరించడమే కాకుండా ప్రజలను తప్పుదోవ పట్టివ్వడం కోసం ఆనాడు బీజేపీ అద్వానీ నాయకత్వంలో అయోధ్య రద యాత్ర చేపట్టింది. ఆనాడు రామమందిర్ రధ యాత్ర చేసిన బీజేపీ నేడు రామమందిర నిర్మాణంలో బి.సి లను బాగస్థులను చేసి మతంలో మునిగి బి.సి ల హక్కులను గాలికొదిలే విధంగా చేస్తున్న బీజేపీ కుటిల రాజకీయాలను ఓబీసీ లు గమనించాలి. మండల్ కమీషన్ ను అమలు చేయరాదని ఆధిపత్య కులాల వారు కోర్టును ఆశ్రయించారు. చివరకు 1993 లో మండల్ నివేదిక అమలుకు కోర్టు అనుమతి ఇవ్వడంతో బి.సి లకు కేంద్ర సర్వీసుల్లో, ఐఎఎస్, ఐపీఎస్, ఐఎఫ్ఎస్, ఐఐటి, ఎన్ఐటి, ఐఐఎం, కేంద్రీయ విశ్వ విద్యాలయాల్లో 52 శాతం జనాభా ఉన్న బి.సీ లకు 27 శాతం రిజర్వేషన్లు ఇచ్చారు. మొత్తం మండల్ కమీషన్ బి.సి ల అభివృద్ధికి 40 సూచనలు చేయగా అందులో ఒకటైన విద్యా ఉద్యోగాల్లో 27 శాతం రిజర్వేషన్ కల్పించి అప్పటి ప్రభుత్వం చేతులు దులుపుకుంది.
పారిశ్రామికీకరణ వల్ల స్థానిక వర్గాల వృత్తులు పెద్ద ఎత్తున దెబ్బతిన్నాయని వారికి ప్రత్యామ్నాయం చూడాలని, భూ సంస్కరణలు చేపట్టాలని, ఓబీసీ లకు కేంద్రంలో ప్రత్యేక మంత్రిత్వ శాఖను ఏర్పాటు చేయాలని, అన్ని రకాల ఆర్ధిక వనరులను రాష్టాలకు కేంద్రమే సమకూర్చాలని, ప్రైవేట్ సంస్థల్లోనూ ఉద్యోగాల్లో ఓబీసీ లకు 27 శాతం రిజర్వేషన్ కల్పించాలని, ఓబీసీ లు ఉన్న ప్రాంతంలో వయోజన విద్యతో పాటు రెసిడెన్షియల్ పాఠశాలలు ప్రారంభించి విద్యార్థుల డ్రాపవుట్ తగ్గించి మెరుగైన విద్య అందించాలని, ఉన్నత విద్యలో చేరే వాల్లకు ప్రత్యేక కోచింగ్ లు ఇవ్వాలని, కుల వృత్తిదారులకు ఆర్ధిక సహాయం, సాంకేతిక సహాయం అందించి చిన్నతరహా పరిశ్రమలు స్థాపించుకోవడానికి ప్రోత్సకాలు, వృత్తి కులాలకు సహకార సంఘాలు, ఉత్పత్తి రంగంలో మౌలిక మార్పులు, ఓబీసీ లకు మిగులు భూమి పంపిణీ లాంటి సూచనలు నివేదికలో పొందుపరిచారు. బి.సి డెవలప్మెంట్ కార్పోరేషన్ ఏర్పాటు చేసి సామాజిక, విద్యా, ఆర్ధిక అబివృద్దికి కృషి చేయాలని ఓబీసీల్లో అత్యంత వెనుకబడిన సమూహాలకు సముచిత స్థానం కల్పించేందుకు వారు అత్యధికంగా నివసించే ప్రాంతాలను డీ లిమిటేషన్ సమయంలో నియోజకవర్గాలుగా మార్చాలని కూడా సూచించారు.
నీతి నిజాయితీకి మారు పేరు బి.పి మండల్
ఆగస్టు 25, 1918 లో బీహార్ రాష్ట్రం మధేపూర్ జిల్లా మోరో గ్రామంలో రాస్ బీహారీ లాల్ మండల్ జమీందారి కుటుంబంలో జన్మించిన బి.పి మండల్ 23 ఏటనే జిల్లా కౌన్సిల్ కు ఎన్నికయ్యారు. జీతం తీసుకోకుండా జుడిషియల్ మేజిస్టేట్ గా పనిచేశారు. 1952 మొదటిసారిగా శాసనసభకు ఎన్నికైన మండల్ ఆరోగ్య శాఖ మంత్రిగా, ఎం.పి గా పనిచేశారు. రామ్ మనోహర్ లోహియా నాయకత్వంలో పనిచేసిన మండల్ 1967 లో.బీహార్ లో జఠిగిన ఎన్నికల్లో 69 మంది ఎమ్మెల్యేలను గెలిపించి ఫిబ్రవరి 1968 లో బీహార్ ముఖ్యమంత్రి గా పదవి చేపట్టారు. బయట నుండి మద్దతునిచ్చిన కాంగ్రెస్ పార్టీ నాయకుల అవినీతిపై విచారణ జరిగితే ఆ విచారణ బుట్టదాకలు చేయాలని కాంగ్రెస్ పార్టీ మండల్ పై ఒత్తిడి చేసింది. అయినా నిజాయితీగా కాంగ్రెస్ అవినీతి నాయకులపై చర్య తీసుకున్నారు. దాంతో కాంగ్రెస్ మద్దతు ఉపసంహరించుకోవడంతో ప్రభుత్వం కూలిపోయింది తన ప్రభుత్వం కూలిపోతుందని తెలిసిన నీతికోసం నిలబడిన నాయకుడు బి.పి. మండల్ 1974 లో ఎమ్మేల్యే పదవికి రాజీనామా చేసి జయప్రకాష్ నారాయణ నాయకత్వంలో అవినీతి వ్యతిరేక ఉద్యమంలో పాల్గొని 1977 లో జనతాపార్టీ తరుపున లోకసభకు ఎన్నికయ్యారు.
కమిషన్ నివేదిక సమర్పించిన 10 ఏండ్ల తర్వాత కమీషన్ సూచించిన 40 సూచనల్లో ఒక్క విద్య ఉద్యోగాల్లో మాత్రమే రిజర్వేషన్ కల్పించింది. అలా కల్పించిన రిజర్వేషన్ పలాలను ఇప్పిడిప్పుడే అందుకుంటున్న బి.సి లకు క్రిమిలేయర్ అని పెట్టి ఉన్నత విద్యా సంస్థలో ఓబీసీ ల కోటాలో మిగిలిన సీట్లను కూడ ఆధిపత్య కులాల వారు కొట్టేస్తున్నారు. అగ్రవర్ణ పేదలకు 10 శాతం రిజర్వేషన్లు ఇస్తే అడ్డురాని చట్టం బి.సి లకు 52 శాతం రిజర్వేషన్ ఇస్తే ఏమవుద్దని బి.సి లు పెద్ద ఎత్తున ఉద్యమించాల్సిన అవసరముంది. 52 శాతం జనాభా కలిగిన బి.సి లకు సకల సామాజిక రంగాల్లో 52 శాతం రిజర్వేషన్లు ఇవ్వాల్సిన బాధ్యత మరచిన ఆధిపత్య ప్రభుత్వాలు ఎన్నో పోరాటాల పలితంగా వచ్చిన 27 శాతం రిజర్వేషన్ కాపాడుకోవడానికి, ప్రభుత్వ రంగ సంస్థలను కాపాడుకోవడానికి, మండల్ సూచించిన ఇతర సూచనలను సాధించుకోవడానికి, ఓబీసీ జనగణన కోసం బి.పి. మండల్ ఆదర్శంగా బి.సి లు ఉద్యమించాల్సిన అవసరముంది. మొదటి కమీషన్ అటుకెక్కగా ఎన్నో ఏండ్ల తర్వాత నియమించబడిన మండల్ కమీషన్ వల్ల కూడా బి.సి ల బతుకులు బాగుపడలేదు. ప్రపంచీకరణ, ప్రైవేటీకరణ యుగంలో వృత్తులు ధ్వంసమై ఆధునీకరణకు నోచుకోక దిక్కుతోచని స్థితిలో ఉడడం, బతకలేక వలస బాట పట్టడం, బలిదానాలు చేసుకోవడం విషాధకరం. బి.సి కులాలు, సంఘాలు రాజకీయాలకు అతీతంగా ఒక్కటై మండల్ స్పూర్తిగా మండల్ నివేదికను అమలుకోసం ప్రభుత్వాలపై ఒత్తిడి తేవడమే పరిష్కారం.
(ఆగస్టు 25 బి.పి మండల్ 102 వ జయంతి సందర్బంగా)
✍️ ...సాయిని నరేందర్, బి.సి స్టడీ ఫోరం, రాష్ట్ర కన్వీనర్ 9701916091
"""" """ """ """ """" """ """ """ """ """ """ """ """ """" """ """ """
ఈ వెబ్సైట్ కు డొనేషన్ / చందా ఇఛ్చి మద్దతు చేయండి ₹ 100, 500, 1000 లేదా మీ ఇష్టం ఉన్నంత చందా ఆన్లైన్ ద్వారా ఇవండి.
గూగుల్ పే లేదా ఫోన్ పే నo : 9224717727 లేదా UPI ID : 9224717727@apl
PayTM No : 7977884658
Please Help this Website by Donating Rs 100, 500, 1000 or any amount as you wish through Online Payment by Google Pay or PhonePe No : 9224717727 or UPI ID : 9224717727@apl
PayTM No : 7977884658
Regards
Hemantkumar Baddy
..........................................☘☘☘